IV CIBERENCONTRO CONCELLO DE MUGARDOS - KERNEL

Dende hoxe, venres, ata o vindeiro domingo día 23 de setembro, na Casa da Cultura de Mugardos celébrase o IV Ciberencontro Concello de Mugardos-Kernel.

O evento terá relatorios de GNU/Linux, xogos, conferencias, lanzamento de hardware, churrascada, etc... Polo que aqueles que visitides a comarca do Ferrol durante estes días non desaproveitedes a oportunidade de dinamizarvos tecnolóxicamente neste Ciberencontro!!

XORNADAS DE SOFTWARE CEIBE NA USC

Os días 20 e 21 de setembro celebraranse en Santiago de Compostela, segundo información do Observatorio TIC, unhas Xornadas de Sofware Ceibe.

Estas xornadas naceron como un evento de referencia para a intercolaboración dos LUGs galegos, co obxectivo de intercambiar experiencias, presentar relatorios e obradoiros referentes ao Software Ceibe. Este ano, igual que o anterior, a temática principal versará sobre redes en GNU/Linux e outros sistemas Ceibes.

Podedes acceder a máis información pinchando aquí.

CURSO DE CREACIÓN E XESTIÓN DE BASES DE DATOS

O Concello do Porriño e o de Salceda de Caselas celebraremos conxuntamente dende o día 10 de setembro ata o 26 do mesmo mes en Colaboración coa Rede de Dinamización da Sociedade da Información un curso de formación específica sobre a Creación e Xestión de Bases de Datos, cunha duración total de 40 horas.
O curso será impartido en colaboración con Mancomun.org e celebrarase no Centro Neural do Centro Multiusos de Torneiros do Porriño en horario de 20:00 a 23:00 horas entre os días 10 e 26 deste mes.
O obxectivo que se pretende acadar é que as persoas asistentes adquiran coñecementos de nivel avanzado na creación e xestión de Bases de Datos co OppenOffice.org Base. Como ven a ser habitual dentro da Rede de Dinamización Tecnolóxica, farase especial fincapé no emprego do Software Libre como unha alternativa válida e eficaz ao software privativo.

ENCONTRO INFORMÁTICO: GALAECIA.NET

Segundo informa a Estratexia Galega da Sociedade da Información, do 14 ao 16 de setembro organízase en Vilagarcía de Arousa a segunda edición da Galaecia.net . Baixo a coordinación da Asociación Sil e o Concello de Vilagarcía este ano a 'party' inclúe por vez primeira obradoiros de formación, especialmente adicados ao software libre.

En Galaecia.net podedes atopar tódala información referente aos obxectivos que se pretenden acadar, á programación e á forma de participar.

Cabe salientar que a participación e totalmente gratuíta, así que paga a pena achegarse ata Vilagarcía de Arousa para adquirir novos coñecemento e divertirse!!